INFORMAZIO PRAKTIKOA

Euskalduna Jauregira nola iritsi

Oinez

Bilbo oso hiri irisgarria da. Erdigunean ostatu hartzen baduzu, Euskalduna Jauregira iritsi zaitezke Abandoibarra etorbidetik (itsasadarraren ondotik) edo Kale Nagusitik paseo atsegin bat emanez.

Tranbia

(Euskotren Tranbia)

“Euskalduna” geralekuak jauregiaren ate-atarian uzten zaitu.

TRANBIAREN MAPA

Metroa

Geltokirik hurbilenak “San Mames” (Irteera: Sabino Arana) eta “Indautxu” (Irteera: Doctor Areilza) dira. Bi geltokietatik 5-7 minutu inguruko bidea dago jauregiraino.

METROAREN MAPA

EGOITZAK

Euskararen Etxea

Erakunde anfitrioia

Euskararen Etxea izango da EMYA 2026ko hainbat jarduera hartuko dituen erakundea, besteak beste, tailerrak, “Solasaldia” eta bisita gidatuak. Euskararen Etxea Bilboko San Inazio auzoan dagoen kultur zentro dinamikoa da, eta euskal hizkuntza eta kultura sustatu, aztertu eta zabaltzen ditu. Bere xedea EMYAk inklusioaren, irisgarritasunaren eta kultur aniztasunaren alde hartutako konpromisoarekin lerrokatuta dago, eta, aldi berean, elkarrizketarako eta trukerako ingurune inspiratzailea eskaintzen du.

Euskalduna Jauregia

Biltzar nagusia eta sari-banaketaren ekitaldia

EMYA 2026ren biltzarra eta sari-banaketaren ekitaldia Euskalduna Jauregian egingo dira, hots, Bilboko kultur eta biltzar zentro enblematikoenetako batean. Hiriaren bihotzean dagoen eraikin hau nazioartean ezaguna da bere arkitektura deigarriagatik eta arte eszenikoen, kongresuen eta ekitaldi instituzional handien gune neuralgikoa izateagatik. Bilboren eraldaketaren erakusgarri da, kultur eta hiri-birmoldaketa arrakastatsuaren mugarri, bere garaian inguruaren nortasun industrialaren ardatz izandako ontziolak zeuden lurren gainean eraiki baitzen. Instalazio modernoak dituenez eta hirigunean bertan dagoenez, espazio ezin hobea da EMYA komunitateari Bilbora ongietorria emateko.

Euskal Museoa

Euskal Museoa Bilboko erdigune historikoan dago, eta Euskal Herriko kultura-ondarea zaindu eta zabaltzen du. XVII. mendeko jesuiten eraikin zahar batean dago eta eskualdeko historia, arkeologia eta etnografia biltzen ditu. Ehun urtetik gorako historia duen museo hau eraberritu egin da duela gutxi, euskal kultura nazioartean ezagutzera emateko. Hala, euskal ondarea mundura zabaltzeko erakusleiho bihurtu da. EMYA 2026ren parte gisa, museoak jarduera bereziak hartuko ditu, Bizkaiaren eta bere komunitateen sustrai kultural sakonak nabarmentzeko.

Guggenheim Bilbao Museoa - Gala afaria

Gaur egungo artearen eta arkitekturaren nazioarteko ikonoa izanik, Guggenheim Bilbao Museoak eragin handia izan du hiriaren kultura- eta hiri-berroneratzean. Frank Gehryk diseinatua eta 1997an inauguratua, museoa ezaguna da bere erakusketa berritzaileengatik eta museo- jardunaren berrikuntzarekin duen konpromisoagatik. 2000. Urtean Europako Museoaren Urteko Saria jaso zuen eta bestela ere bikaintasunaren erreferentea da museoen esparruan. EMYAren 2026ko edizioan, Guggenheimen jarduera zehatzak egongo dira, parte-hartzaileei munduko kultur erakunde eraginkorrenetako bat ezagutzeko aukera emateko.

Athletic Club Museoa - La Campa de los Ingleses

2020ko EMYA sarietarako hautagai izendatua izan zen Athletic Club Museoa eta Europako futbol talde berezienetako baten nortasunean, historian eta balioetan murgiltzeko aukera eskaintzen du. Erakusketa berritzaileen bidez eta komunitatean, tradizioan eta kirol kulturan errotutako narratiba indartsu baten bidez, museoak Athletic Cluben eta Bilbo eta Bizkaiko jendearen arteko lotura sakona erakusten du. Museo honen izendapenak bere museografiaren kalitatea ez ezik, belaunaldi berrien inspirazio-iturri izaten jarraitzen duen ondare bizia babesteko eta zabaltzeko konpromisoa ere aitortu zuen.